सत्र १७० : माझी कॉर्पोरेट दिंडी : माधव जोशी (मुलाखतकार - श्रीराम शिधये)

 २८।०४।२०२२

सत्र १७० वे:

विषय : माझी कॉर्पोरेट दिंडी

सादरकर्ते : माधव जोशी

मुलाखतकार : श्रीराम शिधये

भारतीय उद्योग विश्वातील स्थित्यंतरे जवळून पाहिलेल्या, नव्हे नव्हे, तर त्यात प्रत्यक्ष सहभागी झालेल्या माधव जोशी यांचे हे अनुभव म्हणजे अभ्यासकांसाठी एक महत्वाचा ठेवा बनेल. पुस्तकाच्या प्रकाशनाच्या पूर्व एक curtain raiser म्हणावा असा त्यांच्या मुलाखतीचा कार्यक्रम आपण करत आहोत. त्यांची मुलाखत घेणार आहेत विचारवंत ज्येष्ठ पत्रकार आणि 'एका जनार्दनी अर्थात आरोग्य मनाचे ' चे लेखक श्री. श्रीराम शिधये .विशेषतः १९९१ नंतरच्या म्हणजेच आर्थिक सुधारणा नंतरच्या  काळात औद्योगिक क्षेत्रात झालेले बदल, विशेषतः टाटा आणि इतर अनेक उद्योजक यांची कार्यप्रणाली जवळून पाहिलेले माधवराव  जोशी यांच्या अनुभवांचे कथन कॉर्पोरेट दिंडी या पुस्तक रूपाने १ मे ला प्रकाशित झाले आहे. या पुस्तकाच्या प्रकाशनापूर्वी आजच्या शब्दांगण मध्ये त्यांच्या मुलाखतीचा योग आला आहे. हे सत्र चुकवू नका.

हे सत्र ऐकण्यासाठी खालील दुव्यावर टिचकी मारा !

सत्र १६९ : नर्मदा परिक्रमा : आकाश गुप्ते

२१।०४।२०२२

सत्र १६९ वे:

विषय : नर्मदा परिक्रमा

सादरकर्ते : आकाश गुप्ते

ललितसितदुकूलां मंज्जुमूलां महेशीम् 

करकलिकुटाक्षा अभित्यभीष्टां सुकेशीम् ।

मणिखचितविभूषां भाल बालेंदुभूषाम् 

शिरसि धृत किरीटां नर्मदां चिन्तयामि ॥

आपल्या परंपरेमध्ये नद्यांना विशेष महत्त्व आहे, किंबहुना सिंधू, सरस्वती, गंगा, यमुना अशा नद्यांच्या काठावरच आपली संस्कृती विकसित झालेली आहे. त्याच नद्यांच्या मांदियाळीतली महत्त्वपूर्ण नदी म्हणजे नर्मदा !

संपूर्ण भारताला बरोबर मध्यावर विभागणारी किंवा खरंतर उत्तर आणि दक्षिण भारताला जोडण्याचं काम करणारी ही नदी ! कदाचित त्यामुळेच इतर नद्यांना‌ सहसा न‌ मिळणारा परिक्रमेचा मान या नदीला मिळाला असावा. आणि या परिक्रमेला अजून उत्कंठावर्धक करतात ते अश्वत्थाम्याच्या दर्शनासारखे रोमांचकारी अनुभव आणि त्या प्रवासात भेटणार्‍या माणसांच्या विविध प्रवृत्ती.. त्यामुळे अनेकांना हा अनुभव आयुष्यात एकदा तरी घ्यावा असं वाटत असतंच..

याच नर्मदा परिक्रमेच्या स्वानुभवांवर यंदाचं सत्र घेतायत आकाश गुप्ते !

आणि मुख्य म्हणजे कोविडनंतर प्रथमच ऑफलाईन स्वरुपात सत्र संपन्न होणार आहे त्यामुळे हा विलक्षण अनुभव नक्की चुकवू नका.

हे सत्र ऐकण्यासाठी खालील दुव्यावर टिचकी मारा !

सत्र १६८ : ताई (पद्मभूषण सुमित्रा महाजन यांच्या लोकसभा अध्यक्षीय कारकिर्दीचा आढावा) : डॉ. मेधा किरीट

 १४।०४।२०२२

सत्र १६८ वे:

पुस्तक: ताई (पद्मभूषण सुमित्रा महाजन यांच्या लोकसभा अध्यक्षीय कारकिर्दीचा आढावा)

लेखिका व सादरकर्त्या : डॉ. मेधा किरीट

मंडळी, आजचे शब्दांगण अतिशय खास ! मेधा किरीट आजचे सत्र घेणार आहेत. तेही लोकसभेच्या माजी अध्यक्षा पद्मभूषण सुमित्रा महाजन यांच्यावर त्यांनी लिहिलेल्या 'ताई' या पुस्तकावर. भारताला सुसंस्कृत, सुजाण आणि संयमित नेत्यांची एक समृद्ध परंपरा लाभली आहे. सुमित्राताई हे त्यातील एक आघाडीचे नाव. पूर्व लोकसभेच्या अध्यक्षा, सुमित्राताईंच्या लोकसभा अध्यक्षपदाच्या कारकीर्दीचा बहुपदरी आलेख या पुस्तकात मांडला आहे. एकाच वेळी लखलखती बुद्धी आणि सहृदयता , मार्दव ह्यांचा मिलाफ राजकारणी व्यक्ती मध्ये बघायला मिळणे तसे कठीणच. या गुण वैशिष्ट्यांचे दर्शन आजच्या सत्रात होईल. आजच्या वक्त्या डॉ. मेधा किरीट यांचे कार्य आणि लेखन यांचा स्वतःचा एक प्रभाव आहेच, पण त्यांचे अभिवाचन आणि वक्तृत्व सुद्धा अनुभवण्यासारखे. ज्ञान आणि कर्तृत्व यांचा संगम आजच्या वक्त्या आणि विषय दोन्हीमध्ये मिळतो. हा अनुभव चुकवू नका.. 

हे सत्र ऐकण्यासाठी खालील दुव्यावर टिचकी मारा !

सत्र १६७ : धागे - गुलजार, अनंत दीक्षित : विनोद देशपांडे

०७।०४।२०२२

सत्र १६७ वे:

पुस्तक: धागे

लेखक: गुलजार (शब्दांकन - अनंत दीक्षित)

सादरकर्ते : विनोद देशपांडे

उर्दू शायरी आणि गझल हा प्रत्येक काव्यरसिकाचा जिव्हाळ्याचा विषय ! मिर्झा गालिबपासून बशीर बद्र यांसारख्या उर्दू कवींच्या गझलांनी जनमानसावर गारुड केलेलं आहे. यातलंच एक प्रमुख नाव म्हणजे गुलजार ! जवळपास तीन पिढ्यांवर गुलजारांच्या लेखणीचा प्रभाव आहे. असा या गुलजारांचा एक व्यक्ती म्हणून परिचय, त्यांचं भावविश्व, त्यांच्या संवेदना यांचा अत्यंत जवळून परिचय आपल्याला धागे या त्यांच्या संकलित लेखांच्या पुस्तकातून होतो. याच पुस्तकाचा आजच्या शब्दांगणच्या सत्रामध्ये परिचय करुन देत आहेत विनोद देशपांडे. एका अनोख्या भावविश्वाची सफर करुन येण्यासाठी नक्की ऐका हे सत्र !

हे सत्र ऐकण्यासाठी खालील दुव्यावर टिचकी मारा !

सत्र १६६ : समाजमाध्यमांमुळे मानवी अस्तित्वाचाच प्रश्न निर्माण होतोय का? : श्रीराम कुंटे

३१।०३।२०२२

सत्र १६६ वे:

विषय: समाजमाध्यमांमुळे मानवी अस्तित्वाचाच प्रश्न निर्माण होतोय का ?

सादरकर्ते : श्रीराम कुंटे

गेल्या काही वर्षात सोशल मीडिया शिवाय जगणं अशक्य आहे अशीच परिस्थिती सगळीकडे झाली आहे. PMO पासून ते छोट्या गावापर्यंत अधिकृत आणि व्यक्तिगत कारणासाठी आपण सोशल मीडिया प्रसंगी सोसल त्यापेक्षाही जास्त वापरत आहोत.  पण या सोशल मीडियाचे, आर्टिफिशिअल इंटेलिजन्सचे माणसासाठी दीर्घकालीन दुष्परिणाम काय असू शकतात? सोशल मीडिया आपलं बिहेवियर मॉडीफाय करतोय का? आपल्या संवेदना हरवत चालल्या आहेत का? आपल्या सखोल विचार करण्याच्या क्षमतेला आपण कायमचे हरवत चाललो आहोत का? या आणि अशा अनेक प्रश्नांचा वेध घेऊया आजच्या शब्दांगण च्या निमित्ताने. चुकवू नये असे आजचे सत्र, अभ्यासक श्रीराम कुंटे  घेतायत.... नक्की ऐका !

हे सत्र ऐकण्यासाठी खालील दुव्यावर टिचकी मारा !

सत्र १६५ : The Godfather - Mario Puzo : डॉ. प्रल्हाद देशपांडे

 २४।०३।२०२२

सत्र १६५ वे:

पुस्तक:  The Godfather

लेखक: Mario Puzo

सादरकर्ते : डॉ. प्रल्हाद देशपांडे

आजचे शब्दांगण अगदी खास! गॉडफादर या बहुचर्चित पुस्तक आणि सिनेमावर आजचं सत्र होतंय. गॉडफादर हा इटालियन माफिया वर बनलेला सिनेमा. पण एका भूगोलापूरता मर्यादित न राहता या चित्रपटाने जगावर प्रभाव टाकला.केवळ रसिकांना नव्हे तर अगदी माफियांनाही हा चित्रपट हवासा वाटला, हे आपल्या जीवनाचे चित्रण आहे असे त्यांना वाटले आणि काहींना तर अल पचिनोने रंगवलेल्या विटो या पात्राची नक्कल करावी असं सुद्धा वाटलं. एकूणच गॉड फादर विषयी ऐकण्याची उत्सुकता निर्माण होणं स्वाभाविकच !

आजचं सत्र डॉ. प्रल्हाद देशपांडे घेतायंत. स्वभावाने नेमस्त,  वागणुकीने प्रेमळ, आणि चेहऱ्यावर सदैव मंद स्मित बाळगणाऱ्या, कविमनाच्या डॉक्टरांनी या विषयावर आजचे सत्र घेणे हे सुद्धा विलक्षण. 

हे सत्र नक्की ऐका !

हे सत्र ऐकण्यासाठी खालील दुव्यावर टिचकी मारा !!